Centridiestre a pro, astension di Pd, M5S, Cittadini e Patto, contrari nome Furio Honsell di Open Sinistra Fvg. Il dissen di leç “Ecobonus” sui incentîfs pe difusion di fonts energjetichis rinovabilis al à concludût il so iter in aule al tiermin di une gnove serie di discussions.
“I 100 milions di euros di incentîfs ai privâts – condominis, parochiis e ents eclesiastics di altris confessions – pe difusion des fonts energjetichis rinovabilis a rapresentin un sfuarç economic enormi che al valorize dut il Consei regjonâl e il Friûl-Vignesie Julie e che si met a plen intes politichis di riduzion des emissions incuinantis e di contrast ae energjie cjare – al à dit il governadôr Massimiliano Fedriga dopo che il Consei regjonâl al à aprovât il dissen di leç -. La setemane prossime o tacarìn za cu la aprovazion dal prin bant che al rivuardarà i singui privâts. A lâ daûr ducj chei altris bants par chei altris sogjets tacant dai condominis. Dentri de fin di Fevrâr si podaran presentâ lis primis domandis”. (A.D.G.) – 03.02.2023
