La Procure de Republiche di Pordenon, dopo de muart di Danile Tafa, l’operari di 22 agns copât di un incident sul lavôr inte Stm di Manià, e à viert un fassicul – par cumò cuintri int no cognossude – par omicidi colpôs sul lavôr.
Intes prossimis oris a saran firmâts i avîs di garanzie par chei che si cjatavin in posizion di responsabilitât dentri de aziende indulà che il zovin che al viveve a Vaiont al è stât copât di une sclese incandessente che lu à cjapât inte schene.
Cussì lis personis indagadis a podaran nomenâ i lôr consulents che a sedin presints ae autopsie dal puar zovin, che e sarà fate vinars ai 28 di Març.
La famee dal operari muart e à nomenât come avocat Fabiano Filippin tant che difensôr.
Inte aziende dal incident al è stât fat vuê il prin dì di siopar dai trê previodûts e doman di matine al sarà metût sù ancje un pichet fûr de fabriche. (a.d.g.) – 26.03.2025
