“O imagjini la vôs laiche di Giovanni Bravo che, intune cun chê di Alfredo Battisti, al dîs ai furlans; ‘Sveâisi, tirait fûr lis ideis, dait fuarce ae vuestre braùre, recuperait la fede dai paris’”. A son lis peraulis di pre Luciano Segatto, che vuê al à celebrât in Domo a Udin, intune cun bonsignôr Luciano Nobile e a pre Davide Larice, il funerâl dal imprenditôr e politic furlan di adozion, muart vinars ae etât di 89 agns intal ospedâl udinês. Il corteu funebri al è partît de Cjase funerarie Mansutti e al è rivât ae catedrâl citadine pôc dopo misdì. Tantis lis personalitâts dal mont de politiche e de economie presints par dâi il salût estrem.
“Giovanni Bravo al à lassât il segn su la realtât furlane – al à dit dilunc de omelie pre Luciano -. Al è rivât chi tant zovin di Rho, intal milanês. Al à lassât la scuele dopo doi agns di Malignani, par impegnâsi intal lavôr e inte gavete politiche. I aversaris preseadôrs a disevin che al jere un grant vendidôr. No di fum, ma di rustît e di sostance. Al è rivât – al à continuât il predi – al apiç cence racomandazions, ma dopo un lunc percors di preparazion e di tirocini”. “Di segretari regjonâl dal Psi e president de Cjamare di cumierç di Udin – al à dit pre Segatto – si è pandût come un om di dialic, bon di motivâ i colaboradôrs e di interagjî ancje cui ultins inte scjale jerarchiche. Al veve capît che si fâs scuadre cussì. Al à savût valorizâ i siei tancj talents. Giovanni Bravo – al à concludût – al è stât un visionari, plui di cierts furlans. E lui al jere furlan a 360 grâts”. (a.d.g.) – 28.08.23
104
