Trê personis a son restadis feridis chest dopomisdì intun incident stradâl dilunc de autostrade A4, ae altece di Muçane, tra Tisane e Porpêt, in direzion Triest dulà che si son dâts cuintri une veture e un camion.
A son restadis feridis lis personis che a viazavin su la machine: une anziane cuntun traume ae muse pal sclop dal airbag, une seconde persone e un frut di 5 agns di etât cun lesions lizeris ae muse.
I infermîrs de Sores a àn mandât daurman sul puest l’ecuipaç di une ambulance di Tisane. Lis trê personis a son stadis puartadis al ospedâl di Palme cu la ambulance, in codiç zâl. Nissune e je in pericul di vite. Sul puest i pompîrs e il personâl de autostrade.
A Sant Zorç di Noiâr, invezit, in vie Palladio, incident stradâl tra dôs veturis. Mandâts sul puest i ecuipaçs de machine di emergjence mediche di Tisane, une ambulance simpri di Tisane e une ambulance di Sant Zorç di Noiâr. Coinvolts un fantat di 13 agns e un adult daspò traspuartâts cu la ambulance, in codiç zâl al ospedâl di Palme. (ADG) – 2.12.2022
