Zornade de legalitât intal non di Lorenzo

E je dedicade a Lorenzo Parelli, il zovin student furlan vitime intal 2022 di un incident sul lavôr dilunc di un periodi di “stage” scolastic, la decime setime edizion de “Zornade de legalitât”, inmaneade vinars ai 10. Un percors formatîf che al à cjapât dentri passe un miâr di students par dut l’an scolastic inte suaze dal progjet promovût di une grande rêt di Istitûts superiôrs di Udin e S. Denêl, Glemone e Tumieç. Apontament li dal Teatri gnûf “Giovanni da Udine”, inte suaze de vincjesime edizion dal festival “vicino/lontano”, par presentâ i risultâts dal articolât percors formatîf. Al centri dai lavôrs e sarà propit la “Carta di Lorenzo”, nassude par promovi i valôrs e la culture de sigurece in ogni puest, tacant de scuele. (A.I.) – 09.05.2024