Zornade de Memorie: gnovis ‘pieris’ poiadis a Udin

Dal 2005, ai 27 di Zenâr di ogni an si celebre la “Zornade de Memorie” par ricuardâ lis vitimis dal Olocaust intal dì che lis trupis de Armade Rosse a àn diliberât il cjamp di concentrament di Auschwitz. Za di prime, dal 1992, par onorâ la memorie dai citadins e citadinis depuartâts intai cjamps di concentrament naziscj, in cetancj Paîs europeans si à tacât a poiâ chês che a vegnin clamadis “Stolpersteine” (par furlan “pieris di berdei”) daûr di un viers de Bibie, cul intent di fâ fermâ cui che al passe a cjalâ e a lei il non dal om o de femine puartade intai lager. Il progjet, nassût di un artist todesc, Gunter Demnig, al previôt di meti une o plui “pieris” – in efiet, une piçule tabele di leton, grande tant che une piere cuadrade pal marcjepît – devant de puarte des cjasis la’ che a jerin a stâ lis vitimis dal Nazisim. Il Comun di Udin al è tacât tal 2020 a meti jù cualchi piere de memorie, sedi devant des cjasis che di edifici publics. Chest an a saran dîs, ai 24 e ai 26 di Zenâr, ator pe citât e ancje tai borcs, cui nons dai citadins e des citadinis copâts dai Naziscj par vie de lôr religjon, des ideis politichis e no dome chel. Za di sabide ai 18, tal palaç Morpurgo, e je stade screade une mostre dedicade propit aes gnovis pieris che a saran poiadis. (A.I.) – 23.01.2025