A Aquilee la rassegne di cine archeologjic

Stradis antighis, mosaics sot aghe, dinosaurs, oparis di art etrusche, il misteri dai jeroglifics e lis pituris rupestris: e je dome une part dai documentaris di produzion internazionâl che si alternaran sul palc sot des stelis di place Cjapitul pe decime cuarte edizion dal “Aquileia Film Festival”. La rassegne internazionâl di cine archeologjic inmaneade de Fondazion Aquileia e tache usgnot cuntune dediche ai 25 agns dal ricognossiment dal titul Unesco ae citât, cu la proiezion de anteprime de pontade di “Viaggio nella bellezza” dedicade propit a Aquilee. Miercus ai 2 si jentre tal vîf dal concors fin a vinars: lunis ai 7 e martars ai 8, altris apontaments e ospits, tant che Gigi Delneri, Emilio Rigatti e Francesco Tullio Altan. (A.I.) – 01.08.2023