Pe Fieste di S. Roc a Glemone, promovude dal Comitato Borgate Centro Storico, a saran doi apontaments pardabon interessants. Il prin sabide ai 10 di Avost, aes 10 di matine, sul Cuel dal Cjistiel indulà che e sarà fate une lezion di gjeografie: stant tal alt al sarà mostrât e displeât il teritori dal Glemonàs, fat di monts, di planure aluvionâl e centis morenichis. Par podê partecipâ e je domandade la iscrizion. Il dì dopo, domenie ai 11 di Avost, e sarà la rassegne musicâl “Note nei roccoli e nelle corti”: in place Celotti, cort interne dal Lab Terremoto aes 5 dopomisdì, al sunarà il doi di armoniche AccorDòs fat di Alessio de Franzoni e Sara Rigo.
I doi artiscj a sunaran une musiche componude dal stes de Franzoni pal conciert che al à come teme il viaç e intitulât “Libars di scugnî lâ”, titul cjapât dal libri di poesiis plui innomenât di Leonardo Zanier. Propit di chest libri a son stâts sielzûts i tescj pal spetacul: fra un toc musicâl e chel altri a saran letis poesiis di Zanier par cure di Roberto Foglietta. Il viaç al sarà contât come ricercje di un lûc indulà podê sintîsi a cjase, scjampant des situazions dificilis. Ma il viaç al è ancje ricercje dai lûcs de anime indulà cjatâ pardabon se stes e propit par chest la sielte di lei lis poesiis di Zanier dongje de musiche e je stade fate a pueste. L’inteletuâl cjargnel al à vivût la esperience di jessi migrant lant prime in Maroc e daspò in Svuizare, indulà che si è impegnât pe rivendicazion dai dirits dai imigrâts. Tal câs che al fos brut timp, il spetacul si tignarà al cuviert tal Lab Terremoto. (a.d.g.) – 08.08.2024
