A Gurize si fevele ancjemò di Italo Svevo

Gurize e je ancjemò al centri des celebrazions pai cent agns di “La coscienza di Zeno”, promovudis dal Comun di Triest. Dopo vê ospitât la maratone di leture dal “Svevo Day”, joibe ai 23 e je in program une dople presentazion leterarie, aes 6.30 sore sere inte Sale comunâl Dora Bassi. Riccardo Cepach, responsabil dal Museo Sveviano di Triest, in dialic cu la sagjiste Sergia Adamo, al contarà i doi volums publicâts intal cors dal an: “La funzione S. e altri esperimenti di critica sveviana” e “Ultima sigaretta”. I doi libris a vierzin la dialetiche sugjestive fra Italo Svevo e la sô creature leterarie plui iconiche, Zeno Cosini, il protagonist dal romanç “La coscienza di Zeno”. (A.I.) – 22.11.2023