A Palme un festival pe “citât ideâl”

A van indevant lis propuestis de associazion Culturaglobale e dal festival “Dialoghi” (Dialics), che intes sôs tapis a Palme, dai 26 ai 29 di Setembar, al devente il “Festival de citât ideâl”, par un lunc fin de setemane fat di libris, conferencis e moments di confront ampli e viert fra feminis e oms di culture e di sience. Il teme sielt dal diretôr artistic, Renzo Furlano, al vûl dâ ispirazions pe riflession su variis tematichis che a rivuardin la societât di cumò, dant tal stes timp al public la oportunitât di scuvierzi la citât di Palme. Tancj i ospits a nivel talian e internazionâl, tacant di Sigfrido Ranucci, che domenie ai 29 al cjaparà il Premi ae cariere, za assegnât intai agns passâts a Giovanna Botteri, Enrico Mentana, Alessandro Barbero e Lucia Goracci. (A.I.) – 25.09.2024