A Pordenon si scree la mostre su Magnus, il plui grant dissegnadôr

Il Palaç dal Fumet di Pordenon si vierç par dâ acet al talent di un dai plui grancj mestris talians dal setôr: l’artist bolognês Roberto Raviola, in art Magnus (1939–1996). La mostre “Il segno di Magnus. Da Alan Ford a Tex”, curade di Michele Masini, Luca Baldazzi e Giovanni Nahmias, e je la plui grande mai fate sul so lavôr: pardabon un event, che al sarà screât sabide ai 5 di Avrîl e che si podarà visitâ fint ai 12 di Otubar. La esposizion e va dai prins lavôrs dai agns Cincuante e e rive fint ai Nonante, cun passe 300 oparis, ancje taulis e dissens mai viodûts e la esposizion integrâl des 224 pagjinis de storie di Tex “La valle del terrore”, cognossude tant che “il Texone di Magnus”: un lavôr di siet agns, jessût cuant che l’autôr al jere za muart. Une testemoneance di presit dal incuintri dal autôr cul personaç plui popolâr e cognossût dal fumet talian. In mostre dut ce che Magnus al veve fat in cubie cun Luciano Secchi, ven a stâi Max Bunker, e i personaçs creâts e dissegnâts di bessôl. (A.I.) – 04.04.2025