A Rome la Biblie di Gutenberg riprodote in Friûl

E je rivade fin jù a Rome, a Montecitorio, la riedizion intune serie limitade de Biblie di Gutenberg fate de Fondazion Scriptorium Foroiuliense, che di tancj agns e je impegnade in chest cjamp cun tecnichis inovativis e mestris antîcs. In paralêl ae riedizion dal prin libri stampât in Europe, il Scriptorium Foroiuliense dal president Roberto Giurano al promôf ancje ativitâts didatichis, di ricercje e di inclusion sociâl e al à za fat la repliche di un Codiç di Dante conservât te Biblioteche Vuarneriane di S. Denêl, che al viaze pal mont su la nâf Amerigo Vespucci. Lis copiis de Biblie a saran consegnadis ancje al Museu dal Libri di Kiev e al Museu de Biblie di Washington; une copie e restarà simpri esponude tal Palaç de Aeronautiche, a Rome. (A.I.) – 13.09.2023