A S. Svualt si fevele dal confin che nol è plui

Il festival itinerant “Voci a Est” – dopo lis tapis ospitadis dai festivai “Estensioni”, “vicino/lontano” e “Foyer d’autore” – al va indevant te sale “Pierluigi Di Piazza” dal parc di S. Svualt, cun cinc gnûfs apontaments, a jentrade libare e sore nuie, dai 5 di Març e fint ai 30 di Avrîl. Il prin dai incuintris inmaneâts di Bottega errante al è miercus ai 5 aes 6.30 di dopomisdì cul gurizan Alessandro Cattunar, dotôr di ricercje in Storie contemporanie, che acompagnât di Elisa Copetti al contarà al public la “Storia di una linea bianca” (Storie di une linie blancje). Ven a stâi, la vicende de linie segnade intal Setembar dal 1947 par dividi Italie e chê che in chê volte e jere la Jugoslavie. Ai 19 di Març e sarà invezit la vôs inconfondibile dal gjornalist triestin Sergio Tavčar a contâ la nassite di Telecapodistria, une television di confin che e à fat la storie dal gjornalisim. (A.I.) – 04.03.2025