A San Denêl si impare a scrivi in corsîf

L’istitût superiôr “Manzini” di San Denêl, l’Assessorât regjonâl ae Istruzion e une scuele di caligrafie, ven a stâi il Scriptorium Foroiuliense – Scuola Italiana Amanuensi, a àn unît lis fuarcis par un progjet unic intal so gjenar. Par dut il mês di Setembar, vot classis dal istitût, plui o mancul 150 fantats, a frecuentaran un cors di 15 oris incentrât sul corsîf talian, complet di schede di valutazion personalizade cu la indicazion des areis di miorament. Par students e studentis, une ocasion uniche par recuperâ la manualitât e la sensibilitât, pierdudis massime in chescj agns di DAD. L’obietîf al è dimostrâ – dopo di studis sientifics – che la scriture a man e je fondamentâl par potenziâ capacitât di concentrazion, memorie, organizazion dal pinsîr e proprietât di lengaç. (A.I.) – 20.09.2022