A Scluse intal ricuart dal poete Cappello

Dute une zornade par onorâ il poete Pierluigi Cappello, ma ancje l’om, l’amì, il contadôr, l’insumiadôr sparît masse adore, domenie ai 7 a Scluse, il paîs che i è restât simpri leât e là che al à volût tornâ ae fin dal so passaç teren. “La parola limpida di Pierluigi Cappello” al è il titul de iniziative curade di Giuseppe Tirelli, che si vierç cuntune liturgjie maestose inte Glesie di Sant Pauli Apuestul a Racolane, cu la partecipazion de corâl de associazion Le Colone di Cjasteons di Strade. Par dut il dì, musiche, peraulis e art sul teritori, fin a sierâ cuntune procession ‘laiche’ dal teatri intitulât a Cjapiel fin ae vecje stazion. (A.I.) – 04.08.2022