A “scuele” a Cjasarse par imparâ Pasolini

Dai 11 ai 14 di Setembar a Cjasarse, te sede dal Centri studi – Cjase Colussi, si fasarà la setime edizion de “Scuele Pasolini” dedicade al teme: “Pasolini e l’alterità”, ven a stâi incuintris etnografics, viaçs e confronts antropologjics. Lis lezions, fatis di specialiscj talians e forescj, a saran dedicadis soredut ae produzion leterarie, ai scrits su la poesie popolâr, lis contis di viaç, i romançs e la produzion di cines, massime i documentaris. Lis lezions dai insegnants a contaran lis conessions poetichis, politichis e esistenziâls che Pasolini al à tignût cul popul: i contadins furlans, i romans dai borcs puars, la int dal Tierç mont. (A.I.) – 11.09.2024