A Udin si fevele di vueris e ‘tieris di confin’

Si intitule “Tieris di confin. De Vuere frede ai gnûfs conflits” il forum internazionâl che si tignarà a Udin e Gurize dai 9 ai 11 di Març. Martars ai 21 di Fevrâr ae Universitât dal Friûl, a Palaç Florio, la presentazion cul intervent di Tommaso Piffer, il diretôr sientific di Friuli Storia, e di Mark Kramer, in video de Universitât di Harvard. La cunvigne, inmaneade de associazion Friuli Storia in colaborazion cu la Universitât dal Friûl e il Cold War Studies Project di Harvard, e viodarà storics innomenâts de Vuere frede. Inte suaze de cunvigne al sarà presentât ancje “Frontiera Est”, il prin progjet regjonâl pe valorizazion storiche des struturis difensivis realizadis sul confin orientâl intal vincjesim secul. (A.I.) – 20.02.2023