Ae scuvierte di Udin cu lis contis in scufe sul autobus

Al torne “Audiobus” cuntun viaç dal dut gnûf, che chest an si fâs su la gnove linie di autobus di Udin, la numar “14” dedicade al centri storic, che e dopre dome mieçs eletrics. Cinc corsis par une esperience straordenarie e sureâl ae scuvierte di une Udin “discognossude”. Il progjet, che al è part di “Mobilità Creative” di Zeroidee, al è scrit e diret di Giovanni Chiarot e Renato Rinaldi. Dopo il sucès de ultime creazion, realizade cui fruts e lis frutis des scuelis primariis, chest an Audiobus al da vôs ai fantats e aes fantatis di Hattiva Lab, centri diurni par personis cun disabilitâts, che a mostraran la citât in maniere origjinâl e inspietade. Lis contis a son di podê scoltâ in scufe sabide ai 17 inte suaze dal program di Terminal Festival, dilunc des corsis dal bus des 10 di matine. (A.I.) – 15.06.2023