Ai Colonos si siere cuntune conference di Francesco Messina

Ultin apontament domenie ai 2 di Març aes 4.30 di dopomisdì, li dai Colonos di Vilecjaze di Listize, pe edizion 2025 di “In file”, la rassegne dedicade chest an al “Mysterium”, ven a stâi a “olmis, siums e utopiis di oms e feminis bogns di lassâ il segn”. Par sierâ, une conference di Francesco Messina, dissegnadôr, editôr, progjetist e musicist, dedicade a Georges Ivanovič Gurdjieff jenfri Orient e Ocident. L’armen Gurdjieff al veve svilupât un sisteme par incuintrâ chê spiritualitât che l’Orient al veve conservât miôr, vivint istès ad implen dentri tal svilup de evoluzion sientifiche ocidentâl. In Italie i siei libris a jerin stâts publicâts ancje de L’Ottava, la cjase editore metude sù di Franco Battiato cun Henry Thomasson e propit Francesco Messina. (A.I.) – 01.03.2025