Tal cine “Odeon” si torne indaûr di cuasi un secul

Rivivi lis atmosferis elegantis dai agns ’30 dal Nûfcent traviers lis tecnologjiis plui ae avanvuardie intal compart dal audio video. E je la propueste dal progjet “Odeon VR – Sensing Dolce Vite: An Experiment in VR Storytelling”, che al sarà presentât te Cjase Cavazzini miercus ai 26 e che al permetarà di visitâ, almancul in maniere virtuâl, i spazis dal Cine Odeon: no vuê ma intal 1939, ae vilie de Seconde vuere mondiâl e a pôcs agns de sô viertidure uficiâl. Il progjet, ideât e curât de artiste visive Eleonora Roaro e di Andrea Mariani, al è un esperiment che al vûl dâ spazi ae ricostruzion di un spetatôr calât intal contest storic, cun intor i visôrs pe realtât virtuâl, intun edifici che intal 2004 al fo declarât di interès storic e artistic pal lustri des sôs decorazions e pal progjet architetonic. (A.I.) – 25.06.2024