Rivivi lis atmosferis elegantis dai agns Trente dal ‘900 traviers lis tecnologjiis plui ae avanvuardie intal compart dal audio video. Al è il progjet “Odeon VR – Sensing Dolce Vita: An Experiment in VR Storytelling”, che al sarà presentât li de Cjase Cavazzini, joibe ai 26, e che al permetarà di fâ un viaç intal timp e di visitâ, almancul in maniere virtuâl, i spazis dal Cine Odeon intal 1939, ae vilie de Seconde vuere mondiâl, pôcs agns daspò de sô viertidure uficiâl. Il progjet, ideât e curât di Eleonora Roaro, artiste visive e ricercjadore, si configure tant che un esperiment che al vûl dâ spazi ae ricostruzion di un spetatôr inte storie: l’utent, che al dopre un visôr, al devente il protagonist di une narazion ambientade intun determinât moment storic, in chest câs dilunc dal Fassisim ae fin dai agns Trente in Italie. (A.I.) – 25.09.2024
32
