Al Mulin di Basandiele i “filmins di famee”

Gnûfs apontaments li dal Mulin di Basandiele, che al ospite trê incuintris inmaneâts de Aministrazion comunâl (doi in colaborazion cun Cultura Nuova, un tierç in colaborazion cu la Regjon). Si tache domenie ai 7 aes 6 dopomisdì cun Massimo Garlatti-Costa che al presentarà “Cinema di famiglia” (Cine di famee), il progjet dedicât al documentari amatoriâl dal Nûfcent, dal dopovuere fint ai agns Setante, chei che ur disin “filmins di famee”. Lunis ai 8, la associazion Aulùs e presentarà “Al Mulin cun Tolkien” e l’ultin numar de riviste Contee Furlane. Miercus ai 10, il Servizi biodiversitât de Regjon autonome Friûl-Vignesie Julie al presentarà une schirie di iniziativis dedicadis ai prâts stabii. (A.I.) – 06.04.2024