Al torne “Aspettando … la notte dei lettori”, la anteprime itinerante dal Festival organizât dal Comun di Udin in sinergjie cu lis realtâts culturâls, bibliotecariis, librariis e associativis. Numars di inzirli e simpri plui domandadis di partecipazion. A son di fat 27 i Comuns coinvolts, là che e fasarà tape “Aspettando … la notte dei lettori”, cun plui di 60 avigniments tacant dai 21 di Avrîl e par dut il mês di Mai. E e je dome che la anteprime!
Principi che al sclopete vinars ai 21 di Avrîl cuntun dopli apontament intal Studi udinês dal grant mestri Giorgio Celiberti: conference stampe di presentazion de anteprime e dal teme dal festival 2023; al va indevant cu la inaugurazion di “Aspettando … la notte dei lettori” cu la fieste pe Zornade mondiâl de creativitât e de inovazion.
“Vierzi al teritori, creâ rêt e condivision partint de culture e funzione. E je une idee infetive, necessarie, vitâl, sorprendent. Baricentri dal festival al è Udin, cu lis sôs bibliotechis, librariis e realtâts teatrâls, motôr che al da fuarce e ritmi aes ativitâts dal progjet valorizant lis particolaritâts di ogni partecipant, Comuns e realtât”. Cussì la diretore artistiche Martina Delpiccolo che e à anunziât prin di dut il teme sielt pe edizion 2023 di “La notte dei lettori”. “Un omaç a Calvino, pai 100 agns de sô nassite, al à ispirât il sottitul dal Festival che al ricjape une sô opare, “Il cjistiel dai destins incrosâts”, cambiant une peraule. I “destins” a deventin “confins”, parcè che la storie dal nestri teritori no je tant stade segnade dal Destin o de sorte, cetant invezit dai confins. Duncje “Il cjistiel dai confins incrosâts”. (A.D.G.) – 21.04.2023
