Aquilee: grandis scuviertis pes termis romanis

Une abside monumentâl (ven a stâi: un ambient semicircolâr) larc plui o mancul 30 metris, une desene di tocs di statuis di divinitâts e di imperadôrs e framents di colonis, tra chês une colossâl fate di chel che i disevin “marmul african” (vuê la Turchie). A son lis scuviertis principâls fatis inte aree des grandis termis di Aquilee dai archeolics de Universitât dal Friûl inte ultime campagne di sgjâfs. I studiôs dal Ateneu furlan a àn scuviert cun di plui che la costruzion dal complès e je scomençade tor dal 300 d.d.C., ven a stâi almancul un deceni prin di ce che si crodeve fin cumò. Lis novitâts puartadis ae lûs de scuadre di archeolics dal Dipartiment di studis umanistics e dal patrimoni culturâl de Universitât dal Friûl vuidâts di Matteo Cadario, adun cun Marina Rubinich e Antonio Dell’Acqua, e cu la colaborazion sientifiche de Fondazion Aquilee, a sono stadis judicadis “di valôr straordenari sedi pal stât di conservazion des struturis, sedi pal significât”. (A.I.) – 03.12.2024