Artiscj sul teritori pal benstâ sociâl

Za screade a Palme, te sale esposizions de Loze dai marcjadants, e je vierte fint ai 9 di Març la mostre di Co.So! Artisti per il sociale: un percors che al previôt oparis visivis, tescj, instalazions video e audio, dut fat in laboratoris di art. Il progjet, par cure di Elena Tammaro e Rachele D’Osualdo de associazion culturâl Etrarte, inmaneât in dialic cul consorzi di cooperativis sociâls Il Mosaico, al va indevant dal 2019 par sensibilizâ lis comunitâts de regjon sui temis de salût mentâl, de inclusivitât e dal benstâ sociâl cul jutori de art contemporanie. Ispirâts dal libri “Il monte analogo” di René Daumal, un romanç di aventuris che al celebre il valôr di ogni procès, e cu la poie de Fondazione Friuli, i artiscj a àn tirât dentri zovins e comunitâts par solit separadis, clamâts a lavorâ adun te Sierade passade. Martina Melilli e à vuidât un progjet cui fruts de scuele primarie di Dael e la comunitât di Casa Teresa. A Gurize, Thomas Braida, la cubie di artiscj MAalex e i students dal Enfap a àn lavorât cui residents de “Villetta 2.0”, intant che a Palme si è fat un laboratori dentri dal centri pal tratament dai disturps di alimentazion. (A.I.) – 26.02.2025