ATF e “Nico Pepe”: acuardi di colaborazion

La Associazion Teatrâl Furlane ATF e la Civiche Academie di Art Dramatiche “Nico Pepe” a àn firmât un impuartant acuardi cuadri di colaborazion par ativitâts di formazion, cun risierve di puescj intai cors di espression e tecniche teatrâl. Il president di ATF Guido Covazzi al à marcât che un dai compits dal statût de associazion al è chel di sostignî, stimolâ e fâ cressi sul plan culturâl e artistic i grups teatrâi, simpri al fin di valorizazion dal teatri furlan a nivel amatoriâl. Cussì ancje il Diretôr de Academie Claudio de Maglio al à ricuardât che la Academie, ricognossude dal Ministeri de Culture e ugnule struture di riferiment in regjon intal ambit dal perfezionament dai gnûfs cuadris artistics teatrâi, e je vierte ae citât, al teritori e e risierve une speciâl atenzion aes lenghis, in particolâr a chê furlane. E si rinove duncje une ocasion uniche pai atôrs amatoriâi di podê jentrâ a cors specifics di formazion, patrocinâts pai passe votcent socis ATF, finalizâts a proviodi i necessaris struments tecnics e indreçâts a apassionâts esternis ae Academie. Bielzà dal mês di Avrîl al tacarà il cors “Cjantâ la Vôs”, tignût dal docent Marco Toller. (A.I.) – 26.03.2024