La associazion culturâl Colonos e dediche Avostanis a “Il volt di sede”, ven a stâi la metamorfosi di Kafka in clâf furlane. Il titul de trentesime tierce edizion de rassegne estive e rimande al “zîr di sede”, chel moment straordenari là che “i cavalîrs a deventin stralusints e a passin tal bosc”, daûr di chel che si lei intal dizionari furlan di Giorgio Faggin. A son 13 i apontaments di “Avostanis 2024”, dai 22 di Lui ai 12 di Otubar, che si fasaran intal curtîl di Vilecjaze di Listize cun cuatri tapis itinerantis a Sant Pieri di Zui, a Aquilee, a Gardiscje e a Vile Manin di Passarian. “Avostanis 2024”, par cure de direzion artistiche di Federico Rossi e de direzion organizative di Alessio Screm, al tache lunis ai 22 di Lui cun “Colonos a manete”, un conciert dai gurizans Radio Zastava, coletîf unic intal senari des band europeanis etno-balcanichis. Simpri lunis ai 22, “Curtîl Market – Creazions di autôr”, une esposizion intai spazis dal curtîl di manufats origjinâi di artesanât artistic, par cure di Michele Bazzana e Paola Pasquaretta. (A.I.) – 21.07.2024
Avostanis: trê mês di apontaments a Vilecjaze
53