Bar Sport: intai cuartîrs di Udin si contin lis sfidis, no i campions

Dai 3 di Dicembar e fin ai 10 di Zenâr dal 2025, lis circoscrizions citadinis di Udin a ospitaran “Bar Sport”, storiis di sfidis, riscats e passions, une narazion ‘in cuintripît’ di Paolo Patui. La iniziative, curade de associazion culturâl Bottega Errante, e je fate cul contribût dal Comun di Udin e in colaborazion cu la Biblioteche civiche “V. Joppi”. In dut, a saran siet apontaments inte siet circoscrizions di Udin, dulà che Patui, scritôr e autôr di teatri, al puartarà a scuvierzi il sport che al partìs dal bas, chel che al puarte cun se vitoriis e disfatis, pôris e sperancis, amarece e gjonde, tornant a dâ vite a partidis di balon o di bale tal zei, sfidis di pugjilât e di ciclisim, vivudis no di campions, ma di personis comunis. Il prin apontament al è martars ai 3 di Dicembar inte Biblioteche di S. Gotart. (A.I.) – 02.12.2024