La sperance e je une dai elements che di simpri a puartin indenant il mont. E propri la sperance, inte forme di une colombe, e je su la locandine de seste edizion dal “Festival del coraggio”, a Çarvignan dai 11 ai 15 di Otubar, daspò di une serie di anteprimis. Dilunc de rassegne, che e torne dentri dai lûcs plui ‘debii’ dal nestri timp, si fevelarà dal Iran e de Ucraine, ma ancje di Scampia e di Sarajevo. A saran frontadis tematichis atuâls tant che i cambiaments climatics, la vuere, la scuele, lis migrazions e a fevelâ a saran testemonis che cu la lôr art a àn provât a cambiâ lis robis: pardabon une vore di ospits che a àn tocjât cun man chel che a contin. La programazion si conferme svariade, siore e interessante, intai temis tratâts e in graciis dai ospits: l’innomenât teolic e filosof Vito Mancuso; la “preside che e olse” dal istitût Alpi-Levi di Scampia, Rosalba Rotondo, e il predi cuintri la camore, pre Aniello Manganiello, ducj i doi pe inaugurazion. Come simpri a son previodûts cunvignis, incuintris, presentazions di libris, spetacui teatrâi, concierts, mostris, tal Teatri “Pasolini” e li de Cjase de musiche, intal “Zardin dai dirits” e te biblioteche civiche “Giuseppe Zigaina” (informazions sul sît: www.festivaldelcoraggio.it). (A.I.) – 10.10.2023
Foto di Alice Durigatto
