Al è dut pront pe prime prove di esam pe certificazion de cognossince de lenghe furlane. Lu àn comunicât la ARLeF – Agjenzie regjonâl pe lenghe furlane e la Universitât dal Friûl te conference stampe che e je stade fate ai 24 di Otubar, tal Salon di onôr di palaç Antonini-Maseri, dulà che a àn partecipât Alessia Rosolen, assessore regjonâl al Lavôr, formazion, istruzion, ricercje, universitât e famee; il retôr de Universitât dal Friûl, Roberto Pinton; il delegât pe lenghe e pe culture furlane dal Ateneu, Gabriele Zanello, diretôr dal Centri interdipartimentâl pal Svilup de lenghe e de culture dal Friûl (Cirf); il president de ARLeF, Eros Cisilino e il diretôr de ARLeF, William Cisilino.
L’esam al è fissât pai 27 di Novembar e al permetarà di otignî la certificazion pal nivel B (QCER).
“Chest risultât al derive di un lavôr di grup puartât indenant di dutis lis istituzions regjonâls e statâls che si son impegnadis a promovi la lenghe furlane te istruzion, te ricercje e te alte formazion. Al è un percors che al è tacât tal 2007 cu la norme regjonâl di pueste pe tutele, valorizazion e promozion de lenghe furlane. Intant di chest viaç, o vin potenziât la difusion dal furlan cun azions simpri gnovis e risorsis puntuâls, ancje dentri di dut il sisteme scolastic regjonâl. I dâts a confermin chest impegn cuntune medie anuâl di 27.000 students tocjâts dal aprendiment de lenghe furlane, 1.800 insegnants, 120 scuelis e cuntun numar di classis che al è daûr a cressi, vuê o sin rivâts a 1.680″. Lu à dit Alessia Rosolen, assessore regjonâl al lavôr, formazion, istruzion, ricercje, universitât e famee che e à marcât il lavôr fondamentâl – fat adun cu la ARLeF e cu la Universitât dal Friûl – che al à permetût di meti in vore la certificazion linguistiche, evidenziant che «valorizâ il plurilinguisim e lis minorancis al sarà un teme che al vignarà frontât ancjemò cu la analisi de atuazion dal titul V, ancje daûr de nestre capacitât di intervignî sul sisteme scolastic dal nestri teritori”. Pe esponente de Zonte Fedriga «la certificazion e podarà jessi ancje il pont di partence di un percors par lavorâ sul pussibil riesam dai criteris pal inseriment de liste regjonâl dai insegnants.
“L’impegn de Universitât dal Friûl a pro de lenghe furlane – al à dit il retôr Roberto Pinton – al è testemoneât soredut de ufierte formative che e cjape dentri cors singui, un curriculum specific pai insegnants e diviersis propuestis pal aprendiment linguistic. Chest apontament al è prin di dut une ocasion par vê agrât ae Regjon pal supuart che al à permetût al curriculum furlan di Siencis de formazion primarie di cressi sedi in tiermins di numars che di cualitât, formulant ancje tantis propuestis pal inzornament dai insegnants”.
“Cun di plui – al à marcât il retôr – si à di ricuardâ ancje il setôr de ricercje academiche, dulà che a lavorin ricercjadôrs che a insiorin il panorame sul plurilinguisim e su lis lenghis minoritariis cun visions e metodologjiis gnovis. Chest al à dal sigûr efiets positîfs ancje tal valorizâ la cognossince: integrâ lis lenghis minoritariis a nivel academic, di fat, al promôf la coesion sociâl e il rispiet tra comunitâts diferentis, preservant la diversitât culturâl; ricognossi e valorizâ chestis lenghis, infin, e je une maniere par supuartâ la paritât e la dignitât di ducj”.
Pal delegât pe lenghe e pe culture furlane dal Ateneu, Gabriele Zanello, “il fat che ae fin si sedi rivâts a une certificazion pal furlan al è impuartant ancje a nivel di educazion linguistiche intun sens plui larc. Di fat, jessi judâts a valutâ la proprie competence intune lenghe, ancje se mancul slargjade, al è une vore util, massime pai zovins che le fevelin, par che e deventi produtive sul plan cognitîf e buine di favorî competencis linguistichis plui grandis. E cul incressi lis competencis te proprie lenghe mari si incressin la flessibilitât e la capacitât comunicative ancje in chês altris lenghis che si cognossin. Infin, la certificazion e devente ancje un sburt par studiâ la lenghe cun chê di infuartî in maniere dinamiche la proprie identitât culturâl, sintintsi inmò plui integrâts intal sisteme educatîf o lavoratîf”.
“La certificazion e à une impuartance fondamentâl par che la lenghe furlane e sedi ricognossude ad implen tant che lenghe uficiâl in ducj i setôrs de vite cuotidiane. Cu la atuazion complete di dutis lis fasis de certificazion o podìn meti in vore ce che al è previodût ancje de leç, e favorî il progrès culturâl, sociâl e economic dal nestri Friûl. Chest percors, che al à un valôr pardabon grant, al è stât pussibil in graciis di un invistiment ponderât de bande de Regjon e de Universitât dal Friûl, che no àn dome contribuît pe part economiche, ma che par tocjâ chest risultât si son zovadis des miôr professionalitâts tal cjamp aministratîf e in chel academic”, al à marcât Eros Cisilino, president de ARLeF, ringraciant la professore Fabiana Fusco, che e à coordenât dute la produzion dai materiâi.
«Par chest apontament, che al segne un pas gnûf e rilevant pe tutele dal furlan, o vin fat un lavôr impuartant metint a disposizion tal sît de ARLeF (www.arlef.it) une sezion di pueste su la Certificazion linguistiche. In cheste aree, i candidâts a podaran cjatâ lis simulazions des provis di esam par ognidun dai nivei previodûts, i esercizis e i tescj di consultazion par preparâsi aes provis e ancje dutis lis informazions, come par esempli il “Regolament des provis di certificazion de cognossince de lenghe furlane”. Simpri inte stesse sezion, al è un link a une prove di autovalutazion prontade de Universitât dal Friûl par che i utents a puedin orientâsi te sielte de prove di certificazion linguistiche plui adate al propri nivel di competence», al à sclarît William Cisilino, diretôr de ARLeF.
Cemût notâsi al prin esam pe certificazion de cognossince de lenghe furlane che al corispuint al nivel B dal QCER
Dutis lis informazions par notâsi al esam si puedin cjatâ tal Avîs publicât te sezion “Publicitât legâl” dal sît istituzionâl de ARLeF (www.arlef.it). Ae prove pe certificazion de cognossince de lenghe furlane che e corispuint al nivel B a saran ametûts massim 30 candidâts, daûr dal ordin cronologjic di ricezion des domandis di iscrizion regolârs che a àn di jessi mandadis ae ARLeF. Par notâsi, si à di inviâ la domande dentri dai 8 di Novembar dal 2024, dome vie PEC, ae direzion arlef@certgov.fvg.it. L’esam si fasarà miercus ai 27 di Novembar, a Udin.
Come che al è za stât sclarît parsore, cheste prime prove e permetarà, ai candidâts che a passaran l’esam, di otignî une certificazion pal nivel B, ven a stâi chel “Intermedi”. I nivei a son 4 in dut: A, elementâr; B, intermedi; C1, avanzât; C2, paronance in situazions complessis. A corispuindin ai nivei A2, B1, C1 e C2 dal QCER, il cuadri comun di riferiment pe cognossince des lenghis, scrite e fevelade, adotât cun Risoluzion dal Consei di Europe dal Novembar dal 2001, e che al ven ricognossût a nivel internazionâl par valutâ lis competencis e lis capacitâts linguistichis. (a.d.g.) – 24.10.2024
