Chê volte che… in Slovenie a àn ‘cancelât’ 25 mil citadins

I organizadôrs a son mês che a son in vore pal gnûf calendari di incuintris dal “Festival del Coraggio”, ae cuinte edizion dai 5 ai 9 di Otubar. In spiete, une serie di anteprimis cun presentazions di libris, cjaminadis e proiezions, tacant di vinars ai 15, aes 8.30 sot sere, intal zardin dai dirits di Çarvignan, dulà che al sarà presentât “I cancellati” di Miha Mazzini, che fevelant cun Michele Obit al cirarà di rispuindi a une domande complicade: ce che al sucêt se tu ti cjatis fûr dal sisteme. Il romanç al conte chel che al è sucedût pardabon a 25.671 citadins che, ai 26 di Fevrâr dal 1992, il Ministeri dal Interni de Slovenie al à cancelât dai sistemis informatics. (A.I.) – 12.07.2022