Cincuante agns dal “Premi Nonino” intal ricuart di Benito

Il Premi Nonino al fâs cincuante agns e la edizion 2025 e sarà intal non e intal ricuart di Benito Nonino, il pari de sgnape taliane, muart tal passât mês di Lui. Une dediche intal so paîs, Percût, al om che, intune cu la femine Giannola, al à rivoluzionât il mont des sgnapis, e no dome, cirint lis antighis varietâts vinifaris furlanis par distilâ lis trapis. Sabide ai 25 di Zenâr inte distilarie di Roncjis, la jurie – intune cu lis sûrs Antonella, Cristina e Elisabetta e la mari Giannola – e consegnarà i ricognossiments a figuris di spic dal panorame internazionâl. Il premi plui impuartant pe memorie di Benito al reste il Risit D’Aur, che al larà a Ben Little, irlandês di nassite e furlan di adozion, pal so lavôr su la varietât vinifare dal Pignûl. Il premi Nonino 2025 al è stât assegnât de jurie a Dominique dr Villepin, diplomatic, leterât e inteletuâl nassût in Maroc, une vôs nobile e di alt valôr morâl. Il premi internazionâl al va invezit al poete e scritôr todesc Michael Kruger, intant che il premi “Mestri dal nestri timp” (in chest câs “mestre”) al sarà conferît a Germaine Acogny, danzadore, coreografe e insegnante, buine di puartâ la danze africane intal mont cence mai pierdi il contat cu lis propriis lidrîs. (A.I.) – 09.01.2025