Codroip al fâs fieste pai 75 agns di cariere di Celiberti

Par celebrâ i 75 agns di cariere di Giorgio Celiberti, un artist ricognossût a nivel internazionâl, ma simpri inlidrisât intal so Friûl, il Comun di Codroip al à inmaneât une mostre tal viert di cualchi grande sculture dal artist udinês, che a vignaran colocadis intai lûcs di incuintri e in cualchi place de citadute di joibe ai 14 e fint ai 29 di Otubar. La mostre e je il prin progjet dai avigniments culturâi che a caraterizaran la tradizionâl “Fiera di S. Simone”. Pe scree di “Celiberti a Codroipo – Lo spazio e la materia”, li dal Nodo Hotel, daspò 75 agns e tornarà visibil al public “La ferrovia”, une opare piturade a Udin intal 1947, esponude ae Bienâl di Vignesie e vuê dentri di une colezion privade. (A.I.) – 13.09.2023