Cuant che Triest e jere la citât des spiis

La Associazion de Cjase dal Cine di Triest, in colaborazion cu la Cineteche dal Friûl di Glemone, e presente la mostre “Trieste città di spie” (Triest citât di spiis), che si scree vinars ai 22 li de Cjase dal Cine. In esposizion, locandinis e placâts di cine di spionaç zirâts a Triest o ambientâts inte citât, de fin de Seconde Vuere Mondiâl fint ai agns ’60. La mostre, curade di Tiziana Ciancetta e Gianluca Guerra, e cjape i tocs des colezions preziosis de Cineteche dal Friûl di Glemone e e je fate cul contribût de Regjon Friûl-Vignesie Julie. La citât di Triest dal dopovuere e je stade un lûc che, plui di ogni altri in Italie, al à incjarnât la tension politiche tra lis superpotencis, soredut dal 1945 al 1954, l’an che la citât e je tornade a jessi “taliane”  (A.I.) – 20.11.2024