Cuatri dîs a fevelâ di ‘bufulis’

Passe 60 ospits, 20 apontaments e dôs seradis tal teatri par fevelâ di discriminazions e inteligjence artificiâl, atualitât e leterature, dut contât di esperts des ‘bufulis’. La tierce edizion dal “Fake News Festival”, la uniche rassegne in Italie dedicade aes gnovis ‘inventadis’, propit lis bufulis, e cîr di analizâ e capî un dì di vuê simpri plui imberdeât, a Udin dai 14 ai 17 di Novembar e cuntune anteprime za ai 2. Inmaneade de associazion Prima e curade di Gabriele Franco, e fevelarà di vueris, politiche, ambient, di une societât che e cambie cussì svelte che al è dificil ricognossi la veretât da lis bausiis, e soredut ce che al è tal mieç. Sedis in dut i apontaments vierts al public, cun doi incuintris pes scuelis, un pai students universitaris e lis aziendis, in dîs puescj diferents, là che gjornaliscj, avocâts, professôrs, scritôrs, esperts, comics, chei di ‘Lercio’ cu la lôr rassegne stampe dute di ridi e ‘influencer’ de rêt a fasaran une grande riflession a plui vôs ator dal teme principâl: ise vere… o ben no? Si tache aes 11 di buinore e po dopo, sot sere tal Teatri San Giorgio, Catine e i Papu a presentin il spetacul “Il furlan al è un dialet”. (A.I.) – 13.11.2024