Presentade cheste sere, intal salon dal Parlament dal cjistiel di Udin, la Tv dai furlans, ven a stâi la Tv a domande (Tv on demand) di Telefriuli, dedicade dal dut ai tancj programs in lenghe furlane de emitent televisive dal Gruppo Media Friuli, che chest an e celebre i 45 agns dal inviament des trasmissions. Presints tancj rapresentants des istituzions regjonâls e locâls, che fra chei il president dal Consei regjonâl Piero Mauro Zanin, l’assessôr regjonâl aes Autonomiis Locâls Pierpaolo Roberti, il sindic di Udin Pietro Fontanini e il president de Agjenzie regjonâl pe lenghe furlane Eros Cisilino, di là dai socis e dai vertiçs dal Gruppo Media Friuli.
A son servizi ae comunitât e atenzion ae sô lenghe lis peraulis clâf de iniziative, cemût che a àn marcât il diretôr editoriâl Alfonso Di Leva e il diretôr di Telefriuli Alessandra Salvatori, che e à ricuardât l’inviament dal telegjornâl in lenghe furlane sucedût intal Istât dal 2021. Cu la rivade di chest gnûf servizi i telespetatôrs a podaran acedi cu lis lôr televisions colegadis a Internet, a ducj i programs in lenghe furlane prodots de emitent che, cemût che al à sotlineât Di Leva: “e je la espression plui clare dal spirt di servizi viers la comunitât furlane che e anime cheste iniziative, intal rispiet dai valôrs de Costituzion. Parcè che al è dirit dai citadins jessi informâts inte lenghe che e je fondamente de identitât e de comunitât. Al è un percors che o vin decidût di lâi daûr cundut che nol sedi stât facil. Parcè che ancje se o sin une aziende privade, o sin convinçûts che la lenghe e vedi di jessi doprade il plui pussibil e e vedi di jessi legjitimade dai struments di comunicazion. Par chest motîf, il Grup – al à visât Di Leva, che al à dit graciis aes istituzions locâls, impresis e esponents dal teritori che a son lâts daûr cun atenzion e a àn sostignût lis iniziativis de aziende – al à dedicât i plui impuartants invistiments propit ae lenghe furlane. O sin une aziende privade che e rispiete lis logjichis di marcjât, ma cence jessi sfracaiade di chestis logjichis parcè che chel che al conte al è il servizi fat ae int”.
Laut e atenzion ae iniziative di Telefriuli a son stâts esprimûts di Cisilino, che al à ricuardât ancje l’inviament de publicazion, il passât Novembar, dal setemanâl “La Vôs dai Furlans” e dal sît web, dal dut in lenghe furlane, a dimostrazion dal impegn dal Gruppo Media Friuli. “Lis iniziativis inviadis in Friûl – al à ricuardât dopo il sindic Fontanini intal plausâ al gnûf servizi – a son tâi di rindi cheste regjon un esempli cuant che si fevele de difese des lenghis minoritariis. Anzit – al à sotlineât il sindic di Udin – o pensi che il Friûl al vedi lis cjartis in regule par ospitâ la future Agjenzie europeane des lenghis regjonâls”.
Aes considerazions su cetant che la presince di lenghis minoritariis a sedin tra i motîfs che a fondin la autonomie regjonâl, cemût che al à dit il president Zanin, tant critic bande i fruçons lassâts de Rai ae marilenghe a diference di ce che al sucêt cul sloven, al à fat eco la riflession di Roberti su cetant che al sedi essenziâl che la comunitât e puedi esprimisi inte lenghe par jê plui familiâr e cetant che al sedi essenziâl che il furlan al continui a jessi une lenghe vive parcè doprade in ogni contest. “O podìn dome che dî graciis a Telefriuli e al Gruppo Media Friuli parcè che vuê e je une aziende privade a furnî chest gnûf servizi che si zonte ancje al telegjornâl, segn che al è stât capît tant ben il nestri messaç, o sedi che si puedi fâ economie cu la lenghe minoritarie cence restâ in spiete dai contribûts publics. L’auguri che o fâs ae comunitât furlane al è che tantis altris aziendis a cjapin esempli di cheste iniziative e a capissin che al conven doprâ il furlan dal pont di viste economic e culturâl”. (A.D.G) – 06.02.2023
