Davâr e pant lis sôs testemoneancis archeologjichis

Inte suaze de decime edizion de Setemane de Culture Furlane, promovude de Societât Filologjiche Furlane, la Sorintendence Archeologjie, bielis arts e paisaç dal Friûl-Vignesie Julie e propon doi incuintris dedicâts aes testemoneancis archeologjichis intal teritori di Davâr, te Sale des cunvignis dal Complès turistic ambientâl di Aplis. La prime, dal titul “Due ponti, una strada: tracce di una storia sepolta a Ovaro”, si fasarà sabide ai 27 di Mai aes 5 dal dopomisdì e e sarà la ocasion par fevelâ de discuvierte di doi puints di piere. Une ore daspò si davuelzarà il secont incuintri dal titul “La montagna iscritta: il masso con le iscrizioni venetiche di Mione di Ovaro”, dulà che e vignarà presentade la discuvierte resinte fate inte frazion di Mion di Davâr, ven a stâi un clapon incidût che al è a cirche 1600 metris di cuote e che al presente iscrizions venetichis. (A.I.) – 26.05.2023