De stale inte rêt: “In File” al è ancje su Internet

“In File 2023” al rive su YouTube: la rassegne, intitulade “Tal respîr dal mont”, di un viers di Pierluigi Cappello, inmaneade de associazion culturâl Colonos cul contribût de Regjon Friûl-Vignesie Julie e de Arlef e cu la poie de Distilarie Nonino, si pues viodi in rêt. I incuintris, che a àn animât la vecje stale coloniche a Vilecjaze di Listize intai mês di Zenâr e Fevrâr, a son cumò disponibii inte secuence de lôr realizazion, ogni domenie des 4.30 dal dopomisdì sul canâl YouTube de associazion. Lis regjistrazions video a son curadis di Giulio Ghirardini cu la colaborazion di Lucio De Conti e Giulio Pagotto. Domenie ai 9 il secont apontament “Salirò in cielo, sulle stelle di Dio” (“O larai sù in cîl, su lis stelis di Diu”), une relazion di Gabriele Pelizzari sui mosaics di Teodôr e il prin Cristianisim di Aquilee, cu la introduzion di Walter Tomada. (A.I.) – 06.04.2023