“Dedica 2024” al contarà un dai scritôrs spagnûi plui famôs di vuê

Arturo Pérez-Reverte, un dai plui impuartants scritôrs spagnûi di vuê, chel plui vendût tal mont fra i autôrs dal so Paîs, grant protagonist de leterature contemporanie e par plui di 20 agns corispondent di vuere pe cjarte stampade e pe television, al sarà al centri di “Dedica 2024”, il festival inmaneât de associazion culturâl Thesis. Dai 16 ai 23 di Març dal an che al ven, lant daûr de formule che di simpri le contrassegne, Dedica al larà insot cu la poetiche e l’univiers leterari di Pérez-Reverte in variis espressions artistichis: libris, incuintris, cines, teatri, mostris, avigniments pai adults e lis gjenerazions zovinis, di simpri al centri di un lunc e meticolôs lavôr di coinvolziment e di formazion. Il festival “Dedica” al taiarà il travuart dai 30 agns cuntune schirie di iniziativis dilunc dut il 2024. (A.I.) – 21.11.2023