“Dedica”, trente agns in mostre

Trente agns di “Dedica festival” in mostre, tra fotografiis, dissens, videos, libris, peraulis. E, ancjemò une volte, no par laudâsi di bessôi, ma par sintetizâ trê decenis di ideis, dialics, confronts, passion pai libris, impegn civîl e par fâ viodi a ducj chest percors, graciant intal stes timp cui che al à colaborât par fâlu pussibil. Si intitule “30 anni di Dedica festival. Libri, idee, immagini ed emozioni” (30 agns di Dedica festival. Libris, ideis, imagjins e emozions) la mostre inmaneade de associazion culturâl Thesis cul Comun di Pordenon, che e sarà screade sabide ai 8 inte Galarie “Harry Bertoia” di Pordenon, dulà che e restarà vierte fint ai 4 di Avost. Il visitadôr al podarà “cjatâ” i trente protagoniscj dal festival, ritrats vie pai agns di Basso Cannarsa, un dai fotografs plui autorevui tal mont de editorie, e ilustrâts di Gianluca Buttolo, il rafinât dissegnadôr di Udin. Il visitadôr al podarà vivi ancje une esperience imersive in graciis di une galarie fotografiche di Luca A. d’Agostino e Elia Falaschi. (A.I.) – 04.06.2024