La lenghe furlane e je daûr a fâ strade ancje su Internet. L’inseriment de marilenghe tra chês che si puedin doprâ su Facebook al vierç prospetivis ineditis e al predîs novitât a curte buinis di rivoluzionâ il nestri mût di comunicâ intal sens di doprâ simpri plui dispès e in ogni situazion la nestre lenghe.
La novitât e je stade presentade vuê a Udin, intal palaç de Regjon in presince dai assessôrs regjonâi Sebastiano Callari, (Sistemis informatîfs) e Pierpaolo Roberti (Autonomiis locâls), di Rosa Cialini diretôr Gsi (Aministrazion & Social Impact) Sud Europe, Medi Orient e Afriche di Meta, la societât proprietarie di Facebook, Whatsapp e Instagram, Diego Antonini, president di Insiel e Eros Cisilino, president Arlef.
Il lavôr par rivâ a un risultât tant impuartant al è stât inviât intal 2019 e al à domandât un sfuarç enormi de bande dai tecnics informatics di Insiel e dal personâl de Arlef che e à furnît la consulence par doprâ in maniere corete il furlan su la plateforme sociâl famose che, cemût che e à visât Cialini, e à passât a nivel mondiâl i doi miliarts di utents. “Rivâ a dialogâ e colaborâ cuntune realtât mondiâl tant che Meta – al à sotlineât Cisilino – al fâs intraviodi grandis prospetivis, tant plui che a son simpri plui numerosis lis istituzions che a àn une lôr pagjine Facebbok”.
“Pal moment – al à visât il president di Insiel – la lenghe furlane e pues jessi sielte dome su la version pal web, parcè che al coventarà altri timp par podê fâ cheste sielte su la App par telefonin, dulà che la situazion e je plui complesse, ma i nestris tecnics furlans a son daûr a dedicâsi a chest lavôr cun grande pasion”. La responsabile di Meta si è dite inmagade de bielece de marilenghe pe sô musicalitât e e à confermât la impuartance di cjapâle dentri tra lis lenghis ricognossudis di Facebook parcè Meta di simpri e cîr di fâ de tecnologjie un mieç par facilitâ inte comunitât l’ûs cuotidian de proprie lenghe, element identitari fondamentâl.
“O crôt sche si sedi rivâts a un risultât di no crodi – al à dit Roberti – e che sedi stade vinçude cu lis justis competencis e tante passion une sfide tant grande: i problemis di risolvi a jerin tancj e al principi o vevi cualchi dubi. Il furlan, se pardabon o volìn tutelâlu, nol à di restâ dentri cjase, ma al à di jessi doprât in ogni ocasion de comunitât, cjapâts dentri ancje i modernis Social”. (A.D.G.) -7.02.2023
