Miercus sore sere ai 16 di Otubar si è dât adun a Cividât il Consei diretîf de Assemblee de Comunitât linguistiche furlane (Aclif), l’organisim che al rapresente i Comuns di lenghe furlane, nassût tal 2015 e che vuê al à cuasi 150 socis, ven a stâi plui dal 80% di dutis lis comunitâts che a fevelin par furlan di Udin, Pordenon, Gurize e dal Venit orientâl.
La sielte di fâ une riunion inte citât ducâl e je leade ae volontât di fâ fieste pe sô adesion, decidude pôc timp indaûr, ven a stâi te sentade dal Consei comunâl dai 28 di Jugn di chest an.
Al incuintri a jerin presints il sindic di Cividât Daniela Bernardi, il sindic di Manzan Piero Furlani e il vicesindic di Torean Giuliano Lesa, in rapresentance dal teritori. Pe Aclif a jerin presints il president Daniele Sergon di Caprive, il vice Claudio Violino di Merêt di Tombe, la conseire Ester Filipuzzi di Spilimberc e il president onorari Diego Navarria di Cjarlins.
Sergon tal vierzi la riunion al à ringraciât il sindic Bernardi pe sielte fate de sô Aministrazion comunâl e al à sotlineât che e je propit cheste la fuarce de Assemblee linguistiche che e je nassude dal bas. Il diretîf de Aclif e je stade contente di dâ acet a Cividât di là di Manzan e Torean, ancje pal valôr grant che e rapresente parcè che e je stade la capitâl dal ducât langobart e par secui sede patriarcjâl.
Il sindic Bernardi de bande sô e à palesât la sô sodisfazion pal incuintri e e à marcât lis tantis iniziativis leadis ae culture furlane che si fasin a Cividât, fasint ancje un riclam ae figure dal sindic e senatôr Guglielmo Pelizzo, grant furlanist, che par passe dîs agns al è stât president de Societât filologjiche furlane cjapant il puest di Tiziano Tessitori, pari de Regjon Friûl-Vignesie Julie. (a.d.g.) – 18.10.2024
