Dopli apontament par Carlo Michelstaedter a Gurize

“Mosaics di Europe”, rassegne inmaneade dal Teatri Stabil Furlan, a Gurize, e torne tal auditorium de culture furlane, joibe ai 12 di Dicembar aes 6 di dopomisdì, par un altri apontament su la figure di Carlo Michelstaedter, filosof, poete e artist gurizan, animât di une adesion ideâl ae Italie, e muart che al veve dome 23 agns, intal 1910. La sô vite e je stade trasgressive, sul fîl de spade. La spie di un malstâ metafisic che al cjape cun fuarce i intelets plui profonts de Mitteleurope ae vilie de apocalìs: la Prime vuere mondiâl. La serade si vierzarà cuntun intervent di Marcello Veneziani, intitulât “Metafisiche de zoventût”, propit come il libri che al à scrit cualchi an indaûr. Aes 9 sot sere, tal Teatri Verdi di Gurize, e larà in sene la prime assolude di “Imbraçant a strent la vite. Carlo Michelstaedter e Gurize: famee, amîs, amôrs”, spetacul su la vite dal filosof, produsût dal Teatri Stabil Furlan e de Academie di Art Dramatiche di Udin “Nico Pepe”, cu la regjie di Claudio De Maglio, di une idee di Antonio Devetag. Seconde tape dal progjet “Michelstaedter, la grande trasgression”, che si completarà vie pes manifestazions di “Gurize-Nova Gorica capitâl europeane de culture 2025”, il spetacul al è stât anticipât di “Carlo e Nadia”, titul dal prin studi presentât a Mittelfest, intal Istât dal 2021. (A.I.) – 11.12.2024