Dute une gnot plene di poesie

Intal zardin di palaç Morpurgo a Udin, vinars ai 9, des 10.30 di sere fin aes 2.30 di gnot, al larà in sene “La poesie no duar”, promovût dal Teatri Stabil Furlan in colaborazion cu la Biblioteche Comunâl di Udin. L’avigniment al fâs part de decime “La notte dei lettori”, il festival diret di Martina Delpiccolo, in program di vinars a domenie ai 11, cuntune sessantine di avigniments in 25 lûcs diviers de citât. Cun chest apontament, poetis e poetessis, ma ancje scritôrs e scritoris, atôrs e atoris, a varan vot minûts ognidun par animâ un frament de gnot leint i propris scrits, o chei di cualchi autôr cognossût dal teritori. Risultât: une lungje maratone fate di viers e rimis intes variis lenghis feveladis te nestre regjon, cuntune vore di ospits: Clara Carminati, Ivan Crico, Marta Riservato, Antonella Sbuelz, Claudio De Maglio, Rita Maffei, Massimo Somaglino… (A.I.) – 08.06.2023