Edizion slargjade dal festival urban multimediâl “In\Visible Cities”

Gnove edizion pal festival urban multimediâl “In\Visible Cities” in version “XL”, ven a stâi une edizion slargjade, inmaneade de associazion 4704, in ocasion di GO!2025. Ogni ultime fin de setemane dal mês, tacant di Març e fint a Otubar, al sarà pussibil esplorâ il teritori gurizan cun events itinerants, là che ancje il public al fâs part dal spetacul. Apontaments bogns di valorizâ il patrimoni storic, urbanistic e naturalistic, ufrint gnovis prospetivis sul paisaç e la memorie dai lûcs. I diretôrs artistics de rassegne Alessandro Cattunar, Miriam Paschini e Gioele Peressini a àn metût dongje un cartelon di events simpri leât aes contis dai teritoris doprant i lengaçs dal contemporani. Si rivarà ancje a Gardiscje, di simpri un lûc storic dal festival, cu la idee di cjapâ dentri il public che al sielç di visitâ la Citât europeane de culture 2025. La prime di une schirie di replichis tal viert, dutis leadis ae conte dal Nûfcent, e tache ai 29 e 30 di Març cun “Orfana la mia città” di Riccardo Tabilio: un percors cu la vuide audio di scufis wireless par discuvierzi Gurize e la storie dal so confin. La conte e tache tal Teatri “Verdi”, ma ai 30 tal parc “Piuma” al è programât il spetacul di danze e narazion “Atlante Isontino”, di e cun Giulia Bean, dedicât al Lusinç. (A.I.) – 28.03.2025