Feminis al vôt, la situazion in Cjargne

Un prin plan su la situazion de Cjargne, in particolâr su la popolazion, la economie e lis figuris di feminis impegnadis a nivel civic e politic, intal secont dopovuere e intai agns de ricostruzion. Al è il cûr de gnove sezion monografiche che e inricjirà la mostre “Che genere di voto?” inmaneade de Anpi, ven a stâi ‘Imagjins e peraulis de stampe furlane sul prin vôt aes feminis 1946–1948’, che si vierç a Tumieç, joibe ai 6, li dal Palaç Frisacco, aes 6 dal dopomisdì. Il percors espositîf al presente, inte part principâl, il contest sociâl e il clime politic che a àn dât acet al sufragji universâl feminin inte nestre regjon, traviers une analisi profonde de stampe di chenti. I gnûfs materiâi a son stâts cjatâts intai archivis dai comuns di Dimpeç, Davâr, Paluce, Prât, Ravasclêt, Raviei, Tumieç e Vile di Cjargne. (A.I.) – 05.04.2023