“Fieste de Patrie”: un grum di visitis a lûcs storics

Visitis vuidadis a cualchi lûc storic de citât di Udin miercus ai 3 di Avrîl, inte suaze des celebrazions pe “Fieste de Patrie dal Friûl”. Aes 10 e aes 11 di matine e a misdì, la Societât furlane di Archeologjie e inmanee visitis vuidadis ae sô sede inte Torate Borc di Vilalte. Des 2 dopomisdì, il Consorzi pe tutele dai Cjistiei storics dal Friûl-Vignesie Julie al inmanee une schirie di visitis vuidadis inte Torate di Borc di Aquilee, sede dal stes consorzi. La prime e sarà par furlan e par dut il dopomisdì a saran pandudis gnovis rivuart l’edifici, il Patriarcjât, lis armis e lis armaduris di epoche. Par sierâ, aes 5.30 dopomisdì, une visite vuidade tal Museu dal Domo cu la diretore Maria Beatrice Bertone. A saran fatis viodi testemoneancis de storie dal Patriarcjât di Aquilee, tacant de bandiere dal decim cuart secul. (A.I.) – 02.04.2024