Franca Mancinelli, poetesse zovine di Fano, e je la vincidore de edizion 2022-23 dal Premi di poesie S. Vît dal Tiliment, cu la opare “Tutti gli occhi che ho aperto” (Marcos y Marcos, 2020), risultade chê plui avodade de jurie popolâr che si è dade adun domenie ai 19 di Març al Teatri Arrigoni.
Dilunc dal avigniment, intor de Zornade mondiâl de poesie che si celebre vuê, ai 21 di Març, a son lâts sù sul palc tancj poetis innomenâts, di stîi e di etâts diviersis. Al à viert lis danzis Gianni Moroldo, classe 1931, vincidôr dal premi speciâl pe poesie in furlan cun “Antic al è il Cûr” (Samuele Editore), che i è stât consegnât di Giacomo Vit; dopo Moroldo al è tocjât a Imperatrice Bruno, che cun “Volontà Nobili” (NullaDie editôr) e à vinçût il premi Poetis zovins, consegnât dal professôr Andrea Maggi.
“Il premi dedicât a une zovine poete – al à sclarît l’assessôr ae Culture Andrea Bruscia – al rapresente la novitât di chest an che cun chê o vin volût inovâ il premi, lant inte direzion di incentivâ cheste art nobile tra lis gnovis gjenerazions. Il premi al à une tradizion lungje e prestigjose che o volìn fâ lâ indevant ancjemò par tant timp. Ve parcè che al è impuartant rinovâlu tignint presint gnûfs lengaçs e espressions: l’ûs che i zovins a fasin de peraule al pues e al à di jessi un dai struments che nus permet di inovâ puartant indenant cheste tradizion impuartante”. (A.D.G.) – 21.03.2023
