Friuli Doc, une mostre pai trente agns

I spazis de Galarie Tina Modotti (ex marcjât dal pes) di Udin a ospitaran intal mês di Setembar une mostre fotografiche dedicade ai trente agns di Friuli Doc, là che al sarà fat viodi cualchi “clic” iconic des edizions passadis. La mostre, intitulade “Friuli photo Doc” e curade dal studi fotografic Tassotto&Max di Udin, e racuei plui di cuarante fotografiis, che a fasin vivi la evoluzion di Friuli Doc, tacant de sô origjin dentri des ostariis de citât fint al dì di vuê. Il Comun di Udin al à volût presentâ une mostre popolâr, par visâsi dal entusiasim des personis e marcâ l’aiar di fieste par dut il Friûl e la sô int. (A.I.) – 20.08.2024