“Geografie”, un osservatori su lis rotis gnovis de vite

Di miercus ai 26 e fint a domenie ai 30 di Març, Monfalcon e devente no dome une crosere dal mâr Adriatic, ma un osservatori par indagâ lis rotis gnovis de vite al dì di vuê e lis gjeografiis di une Tiere cjapade dentri jenfri vueris e cambiaments globâls. La setime edizion dal festival “Monfalcone Geografie” e incrose par cinc dîs lis riflessions di passe cincuante vôs dal pinsîr, dal gjornalisim e de leterature di vuê. Ideât e promovût dal Comun di Monfalcon cul jutori de fondazion Pordenonelegge.it, pe cure artistiche di Gian Mario Villalta, Alberto Garlini, Valentina Gasparet e Roberto Covaz, al propon incuintris, spetacui, mostris e cetant altri, tal cûr de citât: de place de Republiche ae Biblioteche, dal Teatri aes scuelis, e no dome. La scree e sarà cul autôr Giordano Bruno Guerri e po dopo e rivarà une schirie di protagoniscj de tv, dai gjornâi e dai libris, ancje di chenti, di Tiziana Panella a Mario Giordano, Fausto Biloslavo, Tommaso Cerno, Angelo Floramo, Marzio G. Mian, Andrea Maggi, Chiara Carminati, Pietro Spirito, Antonella Sbuelz… fint al apontament che al siere la rassegne, cul innomenât musicist Red Canzian. (A.I.) – 25.03.2025